1 Corinthians 11

Anyikwo Ɓeda

1To, fye vi ma pita bwi, ngye shi mi vi Yesu anya nyi. 2Mi ci fye lo ntuge fye pa mi ɓo lo cici fyei zhin ɓoho-ɓohoi she ma wufye. 3Ama mi cei pma fya kpe ge, Yesu nu zhin zanugbai doho-dohoi tukwo. Nyikwoza tukwo ce zanugbai nu; Shekwoyi nu zhin Yesu tukwo n kasun. 4Ntuce nu zanugbai doho-dohoi nwa zhin aduwa ko waʼazi n tanjiyai kun n wo tukwo, to, wo ci Yesu nu wyegba. 5Nyikwoza doho-dohoi kwa n wa zhin aduwa, ko wa zhin waʼazi gni nazaba to wa pui wo tukwo nya m, to, wo ci wo ɓa nu wyegba. Wo to shando lo n nyikwozai n wo la wo tukwo wun vinya n na pmi yim. 6N nyikwoza ta pui wo tukwo nya m, to wola wo tukwoyi gbeya. Ngye ko zhin oɓo vinyikwo nya nu n nyikwoza ba wa kma wo tukwo ya, ko wa gbe ko ya, to, sai wa zhin wa ku ko wan nya. 7Ko to bmiya lo zanugbai wa pui wo tukwo nyaho m, ntuge wo zhin Shekwoyi dogbei nu n wo latu yi ɓe. Ama nyikwoza zhin zanugbai latu nya nu.

8Ntuge zanugbai kmisunyi to ɓei gmi n nyikwoza nun, ama aɓei gmi nyikwoza kmisunyi n zanugbai nu. 9Njesun ato ɓo zhin zanugbai ntu nyikwoza ɓo nu m, ama aɓei zhin nyikwoza ntu zanugbai Bo nu. 10Kwo bmiya lo nyikwoza zhin wa wu ge wo dnalo zanugbai sinta, njesun ge kwa da amalaika.

11Ama pa ge dna n Dagayi shiri, nyikwoza n zanugbayi, ɓa ta mi n tna ajem. 12Ntuge shi a ɓei gmi nyikwoza n zanugbai nyi, njesun lonu nyikwoza nu zhin wa ma zanugbai, ama anya vinya kun n Shekwoyi aba nu.

13Fye mwi ko nfyehin tukwo fya gye, ko bmiya lo nyikwoza wa zhin aduwa gni naza ba n tna alufuta wan yi? 14Kwo kunnu n kohin tukwo kwa wuyi ge, ko zhin oɓo vinyikwo nya nu n zanugbai aba, wa ya tukwo tu cim n tna wun yi. 15Ama ko zhin nyikwoza mwa-mwa nu, n wo tukwo-yi mwakpa, ntuge a gawo ko lonu kwa ze wo nyapui nya nu. 16Ama ngye zaho cei pma lo wa gni-aɓona da ce, to, enya miɓa da konu nyi; nge yi ta shan kunnu doho wulo gbo-om, sai dai ge nyikwoza ku wo tukwo wan alufuta esa nwo ɓa zhin waʼazi ko aduwa cei dna naza begye. A ikklisiya Shekwoyi anya vinya nkoi bwa shi lo lonu nu.

17Ama enya mi ye mada n saiye nyi ko to zhin cici nu n fya ba m, ntuge ofye yezhin na duwa nyakun ta bma zhin lo m, sai koi wun-wun ya. 18Oɓo kmisunyi, a gnami lo ge ajegna lo nfya tasin sanu fya yezhi cei. Ɓeye konyi, ma pwoko gaiciya ga. 19Ama ko bmiya lo ajegna lo fya tasin, ntuge aza ɓa fi lo n gaiciya, a kpe ɓa ye pei-pei.

Aɓonya Tu Dagayi Nyagyi Ɓo

20Esa nu fya ye-zhi n na ba gmanyi fya gyi, fye ta gyi Dagayi nyagyi num, 21ama ofyehin nya. Ntu ge aku gna mige esa fya ɓe nyagyi cei, zaho-zahoi wo wo nyagyi ɓo nu wa ya safi wohin nce azaje-ya, har azaho ɓa tna nyagyi ɓai ci mikun, azahoi ce ɓai gyi ɓai sin n duwyi. 22Fye to na puwai lo nfye ɓa gyi fyei sin? Ko fye gna ye lo fya ci Shekwoyi puwa wyegba, fyei dna aza vinyikwo n ɓa to cei lo nyi ma? Fye gye ge miɓa da ge na n ɓeye tukwoʼa? Mi ci fye nu? Ko fye-fye, mi ta ci fye lo m.

23Ntuge n Dagayi aba nu n ma gwo wu-wu ye n mi kafye wu nyi. Nge dna sukwo nna ɓei kun Dagayi Yesu nyi, Wa la bredi, 24Wa zhin Shekwoyi godiya, Wa sa ko ya, Wa Cige, “Omi nayi nu nyi, n na ga ntu fye ɓo. Fye zhin ko ntu Mi ɓopa ɓo.” 25Njesun lo nu wa la kofi ai ku nyagyi gyi, wa cige, “Kofi ye, ko nu zhin Shekwoyi alkawali woi-woyi dna Maʼmi. Saho-sahoi nfye ɓa sin ko cei, fye zhin ko ntu mi ɓo pa ɓo.” 26Ntuge saho-sahoi ya gyi bredi ye cei, yi sin n kofi ye, yi gna Dagayi efi nabari nu mi har Wa ɓe.

27Ntuce nu, zaho-zahoi wa gyi Dagayi bredi ye, ko wa sin n wo kofi dna zokwo, kota gawo mwa-mwa m, wo zhin Dagayi nayi nu n Wa ʼmi yi laifi. 28Ntuce nu, zaho-zahoi wo mwi wo-hin kpa wa kpe bredi ye gyi, woi sin n kofi ye njesun. 29Ntuge ʼza wa gyi bredi yi, woi sin n kofi yi ntna wohin mwi yi, to woi pa Yesu nayi ɓo n kwa pma yin, to, wo gni Shekwoyi owa kpe wohin tukwo nu. Ntuge wo kpagye nu n Yesu fi ɓo yi. 30Cenu zhin azaho n fye mi ɓa zhin anyasan-yi nu, a kala-gba-yi, har azahoi fi.

31Ndei yi ɓa mwi yihin tukwo kpa, ata shan yi kni zun nʼwa yim. 32Ama sa n Dagayi dayi ʼwa Woi ta yi, Wo zhin lonu n nabai to aɓei zun yi kni ɓedo na ʼnyi yi nun. 33Ntucenu oma-zaje, sanu fya yezhi ntuge fya gyi Dagayi nyagyi, fye zhin fya ku pmi aje. 34Ndei mikun gnu zaho lo, to, wo ku nyagyi pmagyi n wo puwa ntuge to wa lo Shekwoyi ʼwa esa fya yezhi ceyim. Aɓo ɓa celo, mʼɓei zhin ɓa zhi miyi la ɓe.